صباح الخير. قصيده بقلم:احمد الخدرجى

صباح الخير.  قصيده بقلم:احمد الخدرجى
FB_IMG_1517997654666
بواسطة – آخر تحديث –

صباح الخير يا قلب حبيبِك ازَيِّك ؟
يارب بخير
وحشتيني
صحيتي خلاص ؟
شربتي الشاي ؟
حكيتي لحد غيري الحلم ؟
تمام جدا
ياريت بوسه بدون كلمة يا واد اتلم
– أنا كويس ما تتخضيش
تعب عادي
بيتهيألي لطشة برد
سهرت كتير انا امبارح على الكورنيش
حبيبتي مفيش
مجرد بس تغيير جو مش أكتر
أنا و حبة صحاب شبهي
لا و الله بنتمشى
أخدناها من ” الشاطبي” لغاية “بحري ” و رجعنا
مقضيينها ضحك ف ضحك
و أغاني
و قصايد شعر
و العادي .. بتختم برضو بدموعنا
شوية ذكريات و حاجات
و تفاصيل الليالي السودا
ف الوطن اللي بالنسبالنا تقريبا
وقع من خضة الثوره و سابنا و مات
و فاتنا لا أرض تحتينا
و لا فوقنا كمان سموات
بقولِك إيه ..
بلاش تراجيديا ع الصبحيه انا ف عرضك
وحشتيني أوي جداً كتير خالص
يا دين أمي على تنهيدتِك المجنونه و سنينها
ما تتلمي يا بت امال
و تصطبحي و قولي يا صبح
يا دين أمي على الضحكه
و ع السهم اللي طالع منها على روحي ما بيخَيِّبش
وحشتيني أوي فعلاً
يا قلبي بخير أنا و الله ما تخافي
معايا علبتين روثمان
و عندي بُن ف المطبخ
و فاضل أكل ف التلاجه . فُكِّيها
مُصره انتي تشيلي الهم
تعيشي و تسلمي لِيَّا يا أجمل أم
بخير و الله يا حبيبتي
و عاااااااااااااايز بوسه دلوقتي
بدون كلمة يا واد اتلم

أترك تعليقا

تعليقا