حكايات ساخره بقلم:محمد راضىى واحمد ابو رايه

حكايات ساخره بقلم:محمد راضىى واحمد ابو رايه
26112366_1911231272239636_1624434274222913728_n
كتب – آخر تحديث –
محمد راضى
احمدابو رايه

– احمد..!
— واواواوفاء!!
– اه وفاء، مالك اتخضيت كدا ليه كانك شوفت عفريت..؟ وايه اللي في صباعك دي؟!
— دي.. دي.. دي دايرة
– دايرة ايه؟! انت بتستعبط؟ دي دبلة..!
— هما غيروا أسماء الأشكال الهندسية ولا ايه؟ على أيامنا كان اسمها دايرة..!
– انت بتشتغلني، صح؟ دي دبلة وانت لابسها في ايدك.. عارف دا معناه ايه؟
— معناه اني حاطط في ايدي شكل هندسي كان يسمى قديمًا دايرة وأصبح يسمى دبلة لسبب مجهول!
– وحياة أمك؟!
— وايه اللي دخل أمي في الموضوع دلوقتي؟ هو انتي فاكرة إن أمي فيثاغورس فبخلد ذكراها وألبس أشكال هندسية تقديرًا لعبقريتها الفذة وخدماتها الجليلة للعالم، ما عدا طلبة الثانويه العامة!
– انت بتتوه في الكلام؟
— هاه!
– لما اكون بكلمك تسيب الموبايل من ايدك وتركز معايا.. دي دبلة يا أحمد.. دبلة فضة في ايدك اليمين.. بطل استهبال عشان انت عارف كويس دا معناه ايه
— معناه إني مصري وبقلد اجدادي القدماء اللي اخترعوا ما يسمى”صهر المعدن” للحصول على عدة أشكال من معادن استخرجوها من باطن الأرض كالذهب والفضة.. فعملوا منها حُلي وعملات ثم استبدلوها بنظام المقايضه اللي كان قائم.. وبعدين تخلوا عن الذهب والفضة في مقابل الصكوك الورقية ومن هنا بدأت فكرة الفلوس اللي انا شخصيا بحبها جدًا، بس حب من طرف واحد
– يعني إيه حب من طرف واحد؟
— يعني انا بحب الفلوس بس الفلوس ما بتحبنيش
– وايه دخل دا بكلامنا؟
— كلام ايه؟
– مش فاكره.. لا استنى افتكرت.. كنت بنتكلم عن الدبلة
— حاجات كتير دبلت لما الاتحاد السوفييتي إنهار.. أنقاض بتقوم فوقيها حضارات وعجلة الزمن بتدور.. أصل الكرة الأرضية مش هتقف لمجرد إن في حاجة دبلت يعني
– أنا مش فاهمه حاجه!
— دا طبيعي وسط الجو العام المشحون بالتوتر بين الدول، ومحمد بن سلمان اللي اشترى لوحه بـ٤٥٠ مليون دولار وساب القدس تضيع.. القيامه هتقوم صدقيني
– انت بتغير موضوع الدبلة؟
— ان دبلت الوردة ريحتها فيها، بس كلنا هنموت في الاخر.. قوليلي: ايه في الدنيا دي دايم؟ سنين عايم ماشوفتش بر
– هتعمل فيها بهاء سلطان وتغنيلي؟! الاسلوب دا مش نافع
— مدام الاسلوب دا مش نافع، وايه الدافع ادوق المر؟
– برضه؟! قولتلك سيب الموبايل وانت بتكلمني “بتخطف الفون من ايده” الله الله.! مين اللي جنبك في الصورة دي؟
— دي.. دي.. دي.. دي فتاه
– فتاه ازاي يعني؟
— فتاه، أصله كان غريب عن المنطقة وكل ما يسأل حد يتوهه.. انتي عارفة الناس في مصر بيفتوا في كل حاجة
– انت بتقول ايه يابني؟ تطلع ايه البنت دي؟
— انا مش دارس طب، بس بقرا كتير فعندي قدر معقول من المعلومات عامة ممكن أفيدك بيه.. البنت دي تطلع كائن حي من فصيلة الانسان، بتتكون من لحم ودم وعظام وأعضاء أخرى.. تستنشق الهواء  الشهير وبهير وسمير غانم ابو دنيا لفي بينا يا دنيا، دوخيـ…
– انا دوخت فعلا!
— انتي كويسة يا آنسة؟!
– مش عارفة..! هو انا فين؟! وانت مين؟
— انا كنت معدي لقيتك دايخة فقولت اتطمن عليكي، بس واضح انك تمام.. أسيبك بقى، سلاموا عليكم