جليمونوبلو. شعر /أحمد الخدرجى

جليمونوبلو.   شعر /أحمد الخدرجى
24312823_10214759135316750_8058103509202261303_n
بواسطة – آخر تحديث –

جليمونوبلُو
ــــــــــــــ
أنا روحي ليه متعوده
تمشي ف شوارع ضيقه
وتشوف حاجات
من يوم ما سابوا الأرمن الكورنيش
و “جليمونوبلو ” أعلنت
عصيانها ع البشاوات
وعلى الطلاينه
واليهود
واتحولت ل ” جليم ” وسابت ضلها
مرمي ومباح
لجيوش كتير م الدجالين
والهربانين م البدرومات
لبيبان ونس كداب أوي
عماله تفتح ف السما الأولى بقلق
تطلع عماير تبتدي غزو التاريخ
وترُش ملح وأسئله ع الورد يتحول دانات
الفالس مات
ما فاضلش غير مارشات عبيد
بيادات بترشق بوزها ف قلوب البنات
فيعيطوا الاجريج
وبعيد
بعيييييد
“معبد ساسون” واقف وحيد
“يعقوب” مقرفص نفسُه ع السلم ..
وبيقرا من “سفر الخروج”
وكأنه بيعزم على جبين الشوارع
لاحتمال انا معرفوش
مين كان يصدق بس إن “ريمون هانو”
حيسلم المفاتيح لعمال الخزينه
وحيترمي ف قعر السفينه
ومامعهوش غير نُص ضحكة سخريه
مع دمعتين
وقت الرحيل سابهُم على المينا ؟؟
“بجانيني” بيقول للكمنجه بلاش كده
ماتعيطيش
وبيحدف القوس فوق دماغ أطياف كتير
طالعالُه من صولو بن كلب بيعزفُه للبحر
مزيكا دية ولَّا حرب بتبتدي !!
مكانتش ” فيلا لوبون ” بتعرف م الليالي غير سهر
لو حتى كنا ف عز طوبه بتنتفض
بتولع الفوانيس وتتحدى الغارات
مين اللي بدل ريحة الحواديت ونام ؟؟
تفاصيل ” تانيس ” الجميله فين يا كامب شيزار ؟؟
أنا بسألَك عن “صفاء”
و”حوريه”
و”حميدو”
زي اما بسأل كل مره باعدي فيها بالترام
فين الخيول يا ” سبورتنج ” ؟
فين السبق ؟
فين الصهيل ؟!!
شارع ” شريف ” واقف من امبارح
“روميلوس” بيخلع شِفتُه م الديب
وبيشطب التوقيع
مع إن ده الأمل الوحيد
للرِّدَّه لما تكون جميله و مُلهِمَه
شباك أخير
مفتوح على تواريخ بعيده
حتوهب التايهين أوي
مفاتيح دخول اسكندريه اللي استحاله تكون كده
للخوف وللأحزان وطن

أترك تعليقا

تعليقا